بوح: 2013

كتير تجي علينا أوقات نطفش من الحياه ونحس إنها مملّة ممكن يكون الشعور من الطفش أو أوقات الفراغ اللي ما عندنا نملأها إلا في المواقع الاجتماعية "فيس,تويتر,انستقرام"أو بسبب الروتين ولكن يغفل علينا ممارسة"العمَلْ" دائماً في حياتنا..<<خلّو دا الشي على جمب بعدين حنجيلو

حاتكلم أول شي عننا احنا البنات ما عندنا زي الأولاد مواقع خارجية ترفيهية برّا أو نخرج في كل وقت.. نستمتع فيها ما عندنا إلا أغلب شي مولات..وما نقدر نسافر مع صحباتنا زي الأولاد عالأقل بالسيّارة ودا الشي نتمناه طبعا وأنا أولهم بسبب خوف أهلنا علينا

ونفس الشي الأولاد يمكن الأماكن اللي يروحوها دايماً في فئة تسببلهم الملل لأنو شي اعتيادي أو إنو يخرجو يلفلفلو ويفلّوها أو يروحو أماكن من دون فايدة..

في أشياء كتير ممكن نسوّيها خصوصاّ إننا سن شباب قال صلى الله عليه وسلّم لا تزول قدما ابن آدم يوم القيامة من عند ربه حتى يسأل عن خمس : عن عمره فيما أفناه ؟ وعن شبابه فيما أبلاه "وعن عمره فيما أفناه وعن شبابه فيما أبلاه"ولازم نستغل السن دا في الأشياء *الكويسة* عشان نحس إننا أنجزنا وسوينا شي مفيد ولما نكبر حتكون صحتنا موزي دحين طبيعي إنو الإنسان لما يكبر حيتعب شوية..

وأكيد حنقول ما عندنا وقت بسبب الدراسة بس بنضيع وقت كتير في أشياء مالها داعي *الاعتراف بالحق فضيلة*ممكن نحدد أيام نجمع أو نجيب فيها الأشياء المطلوبة ونخلّي يوم للعمل *خميس مثلاً*

طيب من الأشياء اللي نقدر بإذن الله وممكن نسويها..

ممكن نفتح ورشة عمل ونطلع إبداعاتنا الفنيّة ونستفيد منها في تزيين البيت وفي الديزاين

ولو اتحمست صوّر ونزّل في الانستقرام*

ممكن نستخدم الأشياء اللي يبغالها إعادة تدوير في أشياء مفيدة جدّدّدّاً ونوفر أشياء نشتريها بالآلاف,واليوتيوب مليان بطرق كتير وممكن في أشياء إنتا/إنتي تخترعها

ودا مثال

http://www.5odar.com/green-clean-planet/creative-ideas-for-recycling/

http://www.5odar.com/green-clean-planet/brilliant-ideas-for-recycling/

وغيرها الكثير من الأفكار المفيدة

ممكن في كل شهر تخصص من مكافأتك 100 ريال بس أو أقل حسب ما تحب أو لوكنت سن مدرسة تخصص 10ريال من مصروفك وتجيب تيشيرت ما تبغاه نضيف وكويس وأي شي تحبو وتعطيه هدية لعامل النضافة وتمزح معاه وتتصور معاه..وهوّا فرحان بالهديّة عشان يحس إنو *ترا إحنا معاك* وربنا حيباركلك في فلوسك لو أحسنت النيّة

ممكن لو كنت/ي تحب التصميم *استخدام الكمبيوتر* تسوّي فيديو ممتع وفنفس الوقت مفيد وتشجع الناس يسوو الأشياء الكويسة وخصوصاً إنتو الشباب يمديكم تتصوّرو وقت العمل والفن والشغل اللي اتكلمت عنها *فوق*

ممكن ترتّب/ي أشياءك المقربعة خصوصاً احنا البنات "اكسسوارات,كريماتنا أو مكياجاتنا أو ملابسنا"وتشغلي مخك وتخترعي طريقة مفيدة تجيبي فيه الشي اللي تبغيه من دون ما تتقربع الأشياء مرة تانية زي دي مثلاً